علمنى ازاى اركب عجل... اقع فى حضنه.. ويضحك اووى... 
"هعلمك كل يوم حبه.... بس أكبرى"

علمنى
ازاى ارسم
ازاى اكتب
ازاى ابتسم
ازاى احب الشمس
و ازاى احبه


وانا صغيره


الدفا اللى كان ، ومذاكره ماما ليا، 
تفتح الكتاب .. وتفهمنى الدرس حرف وكلمه

الشاطره اللى تحب تقعد فـ اخر دسك ، وابوها يفاجئها بزياره ، ويقعدها فى الدسك الاول
ماما تجلها فجأه علشان تشوف مستواها، تلاقيها جايبه الدرجه النهائيه.. وتفرح



وانا صغيره


حفظ القرآن .. ومين فينا تحفظ اكتر اجزاء منه...
ونسمع .. كل يوم ساعتين قرآن.. وساعه صلاه... وقصص الانبيا ، والاناشيد











وانا صغيره

الشط  والبحر..... "بابا تعالا علمنى العوم"... يحاول .. 
عومى... خايفه
عومى.... هغرق..

قالى ان الموج بيغرق الخوّافين
معلمنيش ان الحياه شط يغرّق، وانى لازم احاسب .. عشان ما اخفش
معلمنيش .. ان كل الناس مش طيبين.. وان كلهم مش هو .. كلهم مش هو




وانا صغيره

استنيت اللى أحبه.....
روحى مستنياه
سيبانى  ليه..... 
وكل البنات تحب... وتزوّغ من الدروس عشان اللى تحبه
وانا مستنياه
"انا صغيره ، والصغيرين بيحبوا بابا وبيحبوا ماما
بكره أكبر ويجيلى هو ، واحبه لما اتجوزه"
كنت مستنياك






وادينى كبرت

0 التعليقات: