رغم اعتراض البعض من اللى عملته

ومن الشجاعه انى اعمل كده بس اهو ده اللى حصل

وكالمعتاد برضه انى ضد الموضع ده من طأطأ الى مالا نهاية


بس عند ام تيتى وام لا لى لو حصل


البدايه........

جايه تعبانه م السفر


ماما: فى موضع كده هقولهولك

انا: ماما انا تعبانه وهدخل اناملى شويه لما اقوم ابقى قولى اللى انتى عاوزاه

ماما: مهو مش نافع الناس جايين بعد العشا

انا : ناس مين

ماما : الحكايه فلانه الفلانيه اتصلت وعايزة تيجى البيت علشان تشوفك

انا: مش قولتلك الموضيع دى انا مش هقبلها بالطريقه دى وانا من قبل ماييجو مش عايزة اتجوز ومش موافقه

ماما: طب ماشى هبقى معاكى هما خلاص جايين اقولهم انا ايه لما ييجوا

انا: زى الشاطره كده الرقم على ال id اتصلى بيهم وقوللهم اى حاجة

ماما: يابنتى حرام عليكى اختك مكنتش بتعمل معايا كده

انا: انا حاجة وهيا حاجة ومش موافقه يعنى مش موافقه

جابت ماما التليفون وقالتلى طلعى اخر رقم اتصلى بيها

اجرتلها المكالمة بابتسامه خبيثة و

ماما: السلام عليكم انا ام ياسمين مامت ساره( نكته امى دى)

انا بتأسف على الموضع بس خالها مش موافق هى بتكمل دلوقتى ومش فاضيه وكده وانا شاورته وقال لما تخلص وتثبت ف شغل فا احنا متأسفين( ده اللى قولتلها تقوله).... ومحدش يقولى احنا ف رمضان

ارتحت نفسيا ودخلت فى سلام الى النوم

وتانى يوم وبرضه جايه م السفر ( من ساعه مابقيت اسافر المنصوره وانا بتجيلى حاجات غريبه بجد)

ماما: بوصى هما اتصلوا تانى ومصممين ييجوا وبيقولوا سمعتنا حلوة وابوكى ومش ابوكى خليهم يجوا بقا

انا : لاه يعنى لاه مفيش حد هيجى ولو حد جه انا هروح لوحده من اصحابى واقعد عندها لغايه مايمشوا

ماتتعبنيش بقا حرام عليكى

ماما : انا خلاص اديتهم معاد بعد العشا تانى

انا: يعنى برضه ماسمعتيش كلامى ونفذتى اللى ف دماغك قبليهم لوحدك بقا

ونظرا لانى تعبانه دخلت للنوم وقررت مش هقبلهم وابقى نايمة وخلاص

ونمت فعلا ولقيت اللى بتصحينى

ماما: ساره قومى

انا : ايه ياماما حرام عليكى بتصحينى ليه

ماما : قومى كلمى خالتك

انا : ييييييييييييييه يبقى هتكلمنى ف الموضع اياه

بالنسبه لماما قراراتها بتحتاج لدعم من ا هلها ف كل حاجة اهلنا بيدخلوا فيها وده كويس ف كل الحالات الا ف حالاتى حاليا

خالتو : ها ياساره مبروك

انا : مبروك على ايه ياخالتوا انا مش موافقه ومش هاوافق

خالتوا ( وهى بتزعقلى جامد): انتى ايه تفكيرك ده كل ولادنا اتجوزوا وانتى اللى هتطلعى شرع وتقولى على كل عريس لاه

انا: انا ياستى مش بفكر ف الموضوع ده دلوقتى انتوا خلاص زهقتوا منى ومش قادريين تتحملوا مسؤليتى

خالتو : مقلناش كده .. دلوقتى لما كل عريس يجيلك ترفضيه لما حد يجيلك تانى ويسال عنك هيقولوله دى بترفض كل العرسان اللى بيجولها فاخلاص هتعنسى

انا : وهو المطلوب

خالتو: ماينفعش ................. ولوك لوك لوك لوك


وانا بنام على التليفون واكتر من ساعه الا ربع هى بتتكلم وانا اقول لاه

اخر مازهقت

انا:خلاص اعملوا اللى يريحكوا بس انتوا مسؤلين عن اللى هيحصل

خالتو: ماشى هاتى ماما

ولوك لوك مع بعض برضه مش عارف فى ايه وانتهت المناوره


قبل العشا..............


ماما: يالله البسى الطقم الفلانى

انا : اشمعنا

ماما: احلى واحد عليكى

انا : كمان هتلبسونى على كيفكوا

ماما: اسمعى الكلام ولو مره واحده ف حياتك بقا

انا : هى جات على الطقم ماشى هلبسه

ومفيش الصلاه خلصت وتخبيط على الباب

يانهااااااااااار هما وقفين على الباب ولا ايه

لقيت سياده اخت المزغود على عينه العريس جايه بطولها

انا : فين المزغود ماجاش ليه ولا هيا بتعمل اختبار الاول

ماما : خلى اليوم يعدى على خير


اخت المزغود: هى فين العروسه

سمعاها كل شويه تكررها وانا الدمعه خلاص مش قادره اكتمها وحاسه بالقهر الاسرى

ماما: انتى بتعملى ايه ده كله

انا:مش بعمل بس مش عايزة ادخل

جرتنى ماما من ايدى وده بعد اصراراها على خلعى للحجاب على حجة ست زينا ليه الحجاب( امى سعات بتتذاكا عليه)

دخلت ووقفت اخت المزغود افندى وباستنى وياسلام كانها تعرفنى من مليون يوم

ولوك لوك لوك مابتطلتش كلام معايا وانا ابوصلها وابتسم ابتسامه صفرا ودى ولا هى هنا

اخت المزغود: هى العروسه بتنكسف مش بتتكلم معايا ليه

ماما: بالعكس ده ساره متكلمه جدا وبتدخل فى اى حوار( مين يشهد للعروسه)

انا : على فكره انا مش بنكسف

اخت المزغود: طب اتكلمى

انا : حضرتك عندك اولاد

اخت المزغود: ايوه كريم


واى كلام بقا عن كريم ......... وتوصياتى الساراوية البحته ليها انها ماتنزلش كريم ف الشارع علشان اصحاب السوء( ال يعنى الواد كبر وهو لسه مكملش 5 سنين)


وزهقت بقا

انا: طب عن اذنكوا انا بقا هقوم

اخت المزغود : طب اجيب المزغود امتا

انا بصيت وقلت ف نفسى ( يبقا سيادتى عجبتها فاهتجيب المزغود يشوف اللى هتبقى مزغوده ف المقابل يااااااااارب ارحمنى من هؤلاء المزاغيد)

وجاتنى فكره ف ساعتها ومش عارفه صح اللى عملته ولا لاه

اخت المزغود منتقبه

وانا ماكنتش حطا اللوان الربيع بتاعت البنات

ميا ميا خلاص جتنى فُوكيره

دخلت وحطيت اللى يقدرنى عليه ربنا( مش طبعا زى اللى كانت حطاه سعاد ف جواز على الطريقه الحديثة لانه كان اووفر اوى)

وبلا شك لبست الحجاب

وراحت اخت المزغود وجرته ف ثانيه ....حتى مش عارفة باين كان واقفلها على بابا الشارع

وخبط الباب ............ايه السرعه اللى انتوا فيها اوووى دى


المزغود مستعجل على المزغده


طاااااايب انا هوريكوا هعمل ايه

انا ايدت كومبيوترى وقاعدت عليه

ماما: ده وقته

انا : عليا شغل بالكوم لازم اخلصه فاقلت اشتغل عليه من دلوقتى( بخدعها)

ماما: طب قومى اخت المزغود بتسال عليكى

انا : طيب

اخت المزغود باصوات مسموعه جدا: ياساره ...... ياعروسه ....انتى رجعتى تنكسفى تانى ولا ايه

وانا ولا انا هنا

وتنده وانا ضرباها طناش

ماما جات: انتى مش سامعه ده كله

عملت نفسى بدنجانه وقلتلها :ها اصلى كنت مركزة ف اللى بعمله

ماما :طيب يالله قومى

خدتنى من ايدى ودخلت

سياده المزغود على قلبه مكسوف مابصش ليا ولا مره وبعدين مش هيشوف الميك اب ويعترض عليا ولا ايه

والصمت يحلق فوقنا هوووووووووووووووس

طب وبعدين ياسرور

وجاتنى فكره تانيه اثبت بقا انى بجحه ومش بنكسف ... واحد بينكسف جاى ينزغد ليه مش عارف.... واكيد عايز واحده مكسوفه زيه

انا : طنط لازم تشربى العصير

اخت المزغود: اصله ساقع اوى

انا: لااااااااا انتى لازم تشربيه علشان ( وانا بضغط على الكلمه دى اوى) لو ماحصلش نصيب ماتقوليش اننا بخلا

هى : لاه ازاى ... وبلبعت نصه وادت للمزغود نصه ...... شويه وهتحطهوله ف بيبرونه

هى : انتى لما اتاخرتى علينا كنتى بتصلى العشا

( رغم انى كنت مصليه الحمد لله بس ماصرحتش بالموضع )

انا: لاااااااا انا كنت قدام الكمبيوتر

هى: بتعملى ايه بقا

انا: واحده مهندسه كمبيوتر هتعمل ايه ياعنى( بتعالا عليها)

هى : شغلك فيه ايه ياعنى

انا: انا بقا بقعد على الكمبيوتر ليل نهار مش بسيبه وف الشغل قاعده عليه برضه ونت بقا وحتا مفيش وقت اساعد ماما ف البيت من كتر مانا مشغوله ......شغلى بقا ( ...................)وقولتلها اللى فيه القسمه اللى تخليها ماتفهمش حاجة خالص هيا والمزغود مكسوف


ماما اتدخلت ف الموضع لانها شايفانى بلغبط ف الكلام وانا مش بلغبط ده انا قاصده

باينتلهم انا انى صايعه نت ولا فاهمه حاجة ف البيت الا انى قاعده فيه


ومشيت من قدامهم وانا قمه ف السعاده لتجهم الاخ المزغود ودهشه اخته لجرأتى ف الحديث وانى اقول انى قاعده على النت ليل نهار

( وعلى فكره حصل كلام كتيييييييييييير يفرسهم منى بس انا بختصر)

ومشيوا فى سلام

وانا اطمأنيت جدا


النهاية .....


ماما : انتى ايه اللى قولتيه جوه ده

انا : مش انتى كونتى عايزانى اقابلهم ..... انتى ماقولتليش اتكلم حلو معاهم

ماما( وهى مبتسمه ): انا قولت انتى اللى هتغلبينى ف الجواز ومحدش صدقنى

وشويه لقتها بتبكى: ابوكى لو كان موجود كان عرف يتصرف معاكى

انا: ابويا لو كنت قولتله من قبل ماييجو لاه مكنش هيدخلهم البيت اصلا


سكتت ومعرفتش ترد كالعاده


انا : عايزة حاجة ياماما بقا سيبينى انااااااااااااااااااااااااااااااام


ونجحت خطه التطفيش بتاعتى جدا

بس الاهم بقا انى مقتنعه


حقوق النشر للخطة محفوظة لسروور بس ومحدش يقلدنى خالص مش كل مرة تسلم الجره... ممكن يلزقوا زيادة والله اعلم


ودمتم عوانس مثلى

3 التعليقات:

غير معرف يقول... 11 سبتمبر 2009 2:25 م  

و ماله العريس حد لاقي يتجوز

غير معرف يقول... 16 سبتمبر 2009 3:24 ص  

طب انتى ليه مش عايزه تتجوزى؟

هههههههههههههههههههههههههههههههههههههههههههههههههههه والله زي العسل انتي يا سارورة

انا علشان نفس الأسباب بعمل كده مع كل واحدة ست في فرح او كده تيجي تسلم عليا كأني مرات ابنها وتقعد تسألني عن حاجات زيادة عن اللزوم
بقعد بقى اقووووووووووول
مابعرفش حاجة ف المطبخ ولا ف البيت
وليل نهار قدام الكمبيوتر والنت
وبابا لو شافني في المطبخ يزعق لي ويقول لي الصحفية ما تشتغلش ف البيت لازم شغالة هههههههههههههه

رغم اني ناوية يعني لما اتجوز انسان بحبه اتعلم كل الحاجات دي ومش هدخل شغالة البيت بس انا قاصدة اوصل عني فكرة معينة