كل سنة وانا لسه زى مانا مابتغيرش
كل سنة طفلة مجنونة شعنونة ... رقيقة وهادية
ومابرساش على بر
متقلبة انقلابات البحر ف شتاه

كان نفسى ف فانوس
وماجاش
ياريتى كنت طفله اكتر من كده جايز كانوا رضيوا يجبولى الفانوس اياه
شوفته ف المنصورة عجبنى وزى كل القطاقيط تنحت قدامه كتيييييييييييير
حسيته بتاعى ... شدتنى صاحبتى وقالتلى:" ايه مالك واقفه ليه "وقاعدت اشاور على الفانوس بتاعى
قالتلى :"ساره نزلى ايدك بلاش شغل عيال"
قلت لماما :عايزة فانوس عاجبنى وهشتريه
لكن ومن غير اسباب اترفض انى اشتريه لمجرد "" انتى كبرتى على كده""

لاه والف مليون لاه
انا طفلة وزى مانا ماتغيرتش

كان نفسى اعلق زينة
زى زمان اقصقص ورق واللزق على سلم بيتنا
ومع العيال أعيلّ زيهم واعلق زينة
دلوقتى "" انتى كبرتى على كده""
لاه والى مالا نهايه
انا طفلة وهبقى زى مانا طفلة ومش هكبر ابدا

بابايا اليوم اللى يسبق اول يوم رمضان
تعالى ياسرور
شغلتنا ... اجبله السلم وشغل الكهربائية يشتغل ونعلق انوار على البلكونة
وكلمة اللــــه تضوى .. جميلة
الله يرحمه بابا ..
دلوقتى ولا فيه انوار ولا فيه زينة

قبل رمضان اتسوق مع بابا الله يرحمه
ويجبلى مكسراتى المفضلة
"الكاجو والفستق"
دلوقتى تولت المسؤليه ماما
عارفه انى عيلة وبشبط واهى بتعترف
وبرضه بجيب الكاجوا والفستق وبكلهم لوحدى زى كل سنة

لكن ملهاش طعم
كل شئ اتغير وانا لسه زى مانا


وانا لسه جوايا طفلة وعمرى ماهتغير

نفسى رمضان ده يكون رمضان اللى زى كل سنة قبل اى سنة غير السنادى
ويبقى عندى الفانوس ايـــاه
وابقى كل سنة زى مانــــا

0 التعليقات: